---

---

---

---

Berger de Xivrey (editor), Recueil des lettres missives de Henri IV Tome VI, 1603-1606 (Paris: Imprimerie Impériale 1853), pp. 302-303:

 

Henri IV, King of France, to Cardinal de Joyeuse:
letter enclosing Instructions

(Fontainebleau, October 4, 1604)

A  MON COUSIN LE CARDINAL DE JOYEYSE,  PROTECTEUR DE MES AFFAIRES EN COURT DE ROME.

 

Mon Cousin,  

Je vous adresse ce pacquet dedans lequel vous en trouverés deux autres , l' un subscrit à vous et à mes cousins les cardinaux de Givry, de Sourdis , de Serafin et du Perron, et l’autre à mon ambassadeur à Rome : dedans lequel il y a plusieurs lettres adressantes tant au dict ambassadeur qu`à chacun des autres cardinaux du Sacré College sur un mesme subject, toutesfois de differente teneur, appropriée à l’humeur et à l’inclination des personnes auxquelles elles s’adressent, au mieux qu’il a esté possible de le faire, comme vous verrés par icelles; car je les ay l`aict fermer à cachet volant exprès, affin que vous et mon dict ambassadeur les voyés et consideriés, devant que de les delivrer, estans en creance sur vous et sur luy. Mais vous n’ouvrirés les dicts pacquets et ne dirés à personne vivante que vous les ayés receus, sinon aprés qu’il aura pleu à Dieu de disposer de Nostre Sainct Pere le Pape Clement VIII, que je prie neantmoins sa divine bonté conserver à son Eglise et à toute la Chrestienté, et singulierement à la France encores plusieurs bonnes années. Mais advenant le trespas de Sa Saincteté, vous manderés premierement mon dict ambassadeur à part, pour vous·mesmes luy consigner et delivrer le dict pacquet adressant à luy, dedans lequel il trouvera une lettre que je luy escris, par laquelle il sçaura ce que je veux qu’il face pour mon service quand telle occasion se presentera. Et aprés que vous aurés advisé et resolu ensemble l`ordre que vous aurés à tenir, et ce que vous aurés à faire pour executer et accomplir ma volonté, vous deux prierés en mon nom les dicts quatre cardinaux de s’assembler en vostre maison, et ouvrirés en leur presence le pacquet premier, qui s'adresse à vous et à eux, dedans lequel vous trouverés une lettre que je vous escris en commun, par laquelle vous sçaurés ce que j'entends et desire que vous faciés en la vacance du Sainct Siege, pour mon contentement et service; à quoy je vous prie de satisfaire de vostre part au pied de la lettre, et exhorter les autres à faire le semblable sans dilliculté ny contradiction. Je me promets que vous vous y disposerés tous d'autant plus volontiers, que le commandement que je vous fais a, comme vous cognoistrés, pour but principal l' advancement et exaltation de la gloire de Dieu, la conservation de l'auctorité du Sainct Siege , le salut, repos et advantage public de la Chrestienté , avec le bien de mon Royaume et mon particulier contentement. Au moyen de quoy je vous prie dereches et vous conjure de ne descouvrir à creature vivante que vous ayés receu les dicts pacquets ny la presente, que aprés le deceds de Sa Saincteté. En quoy, comme je me promets que vous me servirés et obeîrés fidellement et exactement, je vous asseurc aussy que vous me ferés un service tres agreable, que j’attends de la preuve que j'ay faicte de vostre sincere affection et fidelité.  

Je prie Dieu, mon Cousin , qu'il vous ayt en sa saincte et digne garde.

Escript à Fontainebleau, le IIII jour de octobre l604.

HENRY.

DE NEUFVILLE.

 

 

 

 

---

---