©2011 John Paul Adams, CSUN
john.p.adams@csun.edu
Guillaume Ribier (editor), Lettres et mémoires d' Estat des Roys, Princes, Ambassadeurs et autres Ministres , sous les Règnes de François premier, Henry II, et François II Tome second (Paris 1666), pp. 840-842:
Mon Oncle,
J'ay receu l' advertissement que vous m'avez fait de la creation du nouveau Pape le jour de Noël, de la personne de Monsieur le Cardinal de Medicis, à present nommé Pie IV. Je vous envoye le memoire de toutes les graces et autres particularitez que je disire obtenir de sa Sainteté a son nouvel advenement au Pontificat, par l' Abbé de S. Ferme porteur de la presente; pour vous advertir aussi de l'aise et contentement que j'ay eu, que vous ayez fait un si bon oeuvre, que de mettre fin à vostre trop long Conclave, par un si bon sujet que vous avez choisi et éleu, puis que vos autres entreprises n'ont peu aucunement reussir. Et à la verité, je pense que vous n'eussiez sceu faire meilleure Election, les choses estans reduits és termes qu'elles estoient; joint aussi qu'il estoit temps de faire cesser les scandales et calomnies des insidiateurs et ennemis de nostre S. Foy et religion qui commençoient fort a s'en prevaloir, pour confirmer et approuver leurs damnables erreurs et opinions reprouvées. Vous sçavez aussi que ledit Cardinal de Medicis estoit l'un de ceux des Cardinaux Italiens que je vous avois nommez pour favoriser; et je m'assure bien que vous n'aurez manqué de luy mettre devant les yeux les considerations qu'il doit avoir et retenir en memoire de l'obligation perpetuelle qu'il doit avoir et retenir en memoire de l'obligation perpetuelle qu'il a envers moy de son assomption au Pontificat, outre l' Alliance qu il sçait avoir esté tousjours reconnuë par la Reine ma tres chere Dame et Mere; et selon ce que j'ay peu entenre, il es de nature personnage gracieux et traitable, et qui se poura accommoder à toutes choses bonnes et vertueuses, vous regarderez de luy tenir tel langage que vous adviserez par ensemble estre à propos pour le persuader de ma part, comme Roy tres-Chretien et premier fils de l'Eglise à faire tousjours les offices d'un bon Pape et pere commun et universel à l'honneur de Dieu, la conservation de son Eglise et au bien repos et salut de la Chrestienté: en quoy faisant, il se fera reverer, louer, aimer et estimer de tuos les Princes Chrestiens: et là dessus, vous n'oublierez rien aussi de ce qu'il luy faudra toucher et dire pour le disposer particulierement à me conserver son amitié: l'asseurant bien qu'il ne sera jamais importuné de ma part de choses extraordinaires, et qu'il ne trouve justes et raisonnables. Au moyen de quoy je veux bien tant esperer de sa bonté qu'il n'viera envers moy des refus et difficultez que son predecesseur faisoit ordinairement à un chacun assez legerement et sans aucun respect, fust-ce bien ou mal. Vous advisant que j'ay deliberé de l'envoyer visiter, et luy baiser le pied apres que j'auray eu de vos nouvelles; et que suivant ce que vous m'avez asseuré par vos derniers lettres, vous m'aurez fait sçavoir l'estat et disposition des affaires de delà, et comme tout y fera passé. Ce que vous ourez faire entendre à sa Sainteté par maniere d'excuse, d'autant que je n'ay pas encore eu de vous que le seul advertissement de sa Creation.
16 Janvuier 1559.
[Memoire de toutes les graces et autres particularitez]
I. La confirmation des Indults, quant à la nomination aux Benefices electifs de ses Royaume et Duché de Bretagne, Dauphiné, et Provence, selon la propre forme et teneur de ceux qui furent expediez au feu Roy son Pere dernier decedé pour sa vie, avec extension pour le regard des Benefices Consistoriaux depuis depuis la mort dudit feu Seigneur Roy, jusques au jour de la confirmation, soit en Cour de Rome, ou dehors en ce Royaume, et lesdits Pays de Bretagne, Dauphiné, et Provence, comme il fut octroyé audit feu Roy à son advenement à la couronne.
II. La confirmation du Rescrit Apostolique que le feu Pape Paul IV. addressa à Messieurs les Cardinaux de Lorraine, de Bourbon et de Chastillon pour proceder à l' Inquisition des heretiques et mal-sentans de la foy en ce Royaume, avec les authorité, pouvior et faculté contenus par ledit Rescrit; et sera adjousté à l' addresse, que celuy desdits Seigneurs trois Cardinaux qui se trouvera seul à la cour, poura prendre et faire proceder à ladite Inquisition pour l' execution d' iceluy Rescrit par ceux qu'il commettra et subdeleguera de la qualité contenuë par ledit premier Rescrit.
III Un autre Rescrit que le feu Seigneur Roy et depuis son trépas le Roy son fils à present regnant, ont fait solliciter envers ledit feu Pape Paul pour estre addressé à l' Evesque d' Amiens Messire Nicolas de Pellevé, avec Delegation, pour proceder à la reformation de l' Eglise d'Escosse; dont ont esté envoyez les Memoires à Monsieur d' Angoulesme Ambassadeur à Rome, lequel en doit solliciter l'expedition, et pareillement Monsieur le Cardinal Sermonette Protecteur des affaires dudit Escosse, auquel il a esté, comme il est encore presentement, dereches écrit de ne proposer aucuns Benefices Consistoriaux, sans que pes Placets soient premierement signez par l'Ambassadeur du Roy estant au pres de nostre S. Pere, ainsi qu'il est accoustumé de faire pour les Benefices Consistoriaux de ce Royaume. Il faut aussi avoir revocation des Provisions qui pourioent avoir esté par cy-devant faites en Cour de Rome d'aucuns benefices consistoriaux dudit Escosse sans les Placet et rescription du Roy et de la Reine.
IV. Sera aussi advisé, si pour impugner et debatre les erections d' Archevesché et Eveschez faites en Flandres, avec l' exemption de Cambray, il sera bon que le Roy intervienne, et que la poursuite s'en fasse tant en son nom, que' en celuy de Monsieur le Cardinal de Lorraine; surquoy sera envoyé Pouvoir audit Evesque d' Angoulesme, selon ce que Messieurs les Cardinaux estant par delà, seront sçavoir au Roy.
V. Sera faite instance pour le recourrement de vingt-quatre mille escus volez au feu Roy par le Comte de Bagne, avec opposition à la delivrance et nouvelle investiture que l'on pouroit faire des biens dudit Comte, dont il fut privé et depossedé par le feu Pape; desquels biens la Chambre Apostolique se trouve à present saisie. Au moyen dequoy pour obvier à ce qui pouroit intervenir entre ledit Comte de Bagne et le Marquis de Montebelle qui avoit esté investy desdits biens par ledit feu Pape Paul. Item pour le remboursement de vingt-sept mille escus que le feu Roy presta et envoya à Parme pour la garde et deffense dudit Parme durant le temps de la vacation du S. Siege par le trépas du Pape Paul III.
VI. Estans les procez et differens concernans les droits de la Reine Mere du Roy demeurez jusques icy indecis, ladite Dame veut et entend qu'ils soient poursuivis, ou bien que l'on trouve moyen d'en accorder par voye aimable. Ce qui meut le Roy de faire instance de la renonciation des provisions faites du vivant du feu pape Paul IV. siot en vertu des Placet, Rescription, et nomination de luy et de la Reine son Epouse, ou dans iceux d' aucuns Benefices Consistoriaux du royaume d' Escosse, est que ceux qui ont esté et sont pourveus d'iceuxs Benefices, sont personnes indignes et qui meritent d'estre privez de la administration desdits Benefices, pource que ce sont ceux qui pour ce jourd'huy se trouvent des premiers qui soutiennent et maintiennent audit Escosse leur erreurs et fausses Doctrines contre nostre Sainte Foy et Religion, et favorisent en tout ce qu'ils peuvent les rebelles et autres heretiques qui troublent ledit Royaume contre leur Roy et Reine.
©2011 John Paul Adams, CSUN
john.p.adams@csun.edu