©2011 John Paul Adams, CSUN
john.p.adams@csun.edu
Joannes Baptista Gattico, Acta Selecta Caeremonialia Sanctae Romanae Ecclesiae ex variis mss. codicibus et diariis saeculi xv. xvi. xvii. Tomus I (Romae 1753), 391:
Die Sabbathi 22. mensis Februarii [anni 1550] hora circiter 20. Julius Papa III. coronatus Romae supra gradus Ecclesiae Beati Petri in ornatissimo pulpito ibidem ad hoc constructo per Rmum D. Innocentium Sanctae Mariae in Dominica Diaconum Cardinalem de Cibo nuncupatum primum, celebrata prius per Sanctitatem suam solemni Missa in dicta Ecclesia S. Petri, et aliis ceremoniis in similibus uti solitis de more peractis, praesentibus 42. Cardinalibus [their names are listed in the mss., but Gattico omits them]
Quatuor autem alii, qui interfuerunt electioni, non fuerunt praesentes, quia Tridentinus jab abierat ab Urbe, Carpensis, et de Sylva et de Lotharingia erant in Urbe, sed aegrotabant: in qua Urbe aderant et alii duo Cardinales infirmi, qui non interfuerunt Electioni, neque Coronationi, cum jam antea exivissent Concave ob ingravescentem eorum valetudinem, cui quidem Coronationi interfuerunt etiam Oratores Imperatoris, Regum Christianissimi, Romanorum, Portugalliae, Venetorum, Florentinorum, Bononiensium, Urbinatensis, Senensis; nec non Barones et Nobiles innumeri, tantaque Populi multitudo, ut numquam antea majorem in spectaculis publicis Romae visam fuisse communi omnium opinione crederetur, usque adeo, ut etiam tecta Palatiorum ac arborum in capite Montis Janiculi sitarum culmina, innumeraque pulpita, diversis in locis hac sola de re constructa, utriusque sexus spectatoribus cooperta, plenaque conspicerentur.
Hac eadem die Coronationis Pontifex dedit prandium omnibus Cardinalibus ac Oratoribus Principum in Palatio Apostolico in Aula magna Constantini. Cardinales vero, qui fuerunt praesentes notantur superius in ipsa coronatione demptis Tranensi, Neapolitano, vel Sabinensi, sexque Oratoribus supradictis. Quod prandium omnibus ferculorum numeris absolutissimum fuit, ut tanti Principis majestas, diei solemnitas, ac Magnatum nobilitas et dignitas exposcebant.
Profectio Pontificis Julii III ad Ecclesiam S. Mariae supra Minervam.
Decreverat hac die Lunae 14. Martii 1550. Pontifex ire ad Ecclesiam Lateranensem, ut moris est, quod Pontifex noviter creatus, antequam in publicum equitet, eat ad ipsam Ecclesiam Lateranensem, ut quod vulgo dicitur, dictae Ecclesiae possessionem capiat, cum habeatur prima, et caput omnium Ecclesiarum totius Orbis, prout testantur carmina, quae supra porticum dictae Ecclesiae parte inferiori sculpta in marmore adhuc hodie videntur, videlicet:
Dogmate Papali datur simul et Imperiali,
Ut sit cunctorum caput mater Ecclesiarum.
Quod etiam postea declaratum fuit a Gregorio X. addita de hoc Bulla, quae etiam adhuc videtur sculpta in marmore in pariete dictae Ecclesiae affixo prope locum ubi nunc Sacramentum Eucharistiae conservatur. Cum autem Pontifex equitaret sociatus ab omnibus Cardinalibus, Praelatis, et Officialibus Urbis pontificaliter cum maxima pompa, ut ad dictam Ecclesiam proficisceretur, caepit pluere, cum sanctitas Sua esset prope Ecclesiam S. Mariae supra Minervam. Qua de causa, coactus fuit Pontifex intrare dictam Ecclesiam, ut pluviae finem expectaret. Invalescente vero pluvia, ac nocte appropinquante necessarium fuit dictam profectionem ad alium diem differre. Quare Pontifex in dicto Monasterio Minervae ea nocte quievit; quod eo libentius fecit, cum mane advenientis diei ibidem Missa solemnis Pontificia celebrari deberet, et Sanctitas Sua in ea praesens esse vellet.
©2011 John Paul Adams, CSUN
john.p.adams@csun.edu