©2011 John Paul Adams, CSUN
john.p.adams@csun.edu
George Williams (editor), Memorials of the Reign of King Henry VI: Official Correspondence of Thomas Bekynton, Secretary to King Henry VI, and Bishop of Bath and Wells Volume II (London 1872), no. CCXLIV, pp. 111-112:
Epistola ejusdem Johannis Papae Studio Parisiensi transmissa, super eadem materia transmissa.
Iohannes episcopus, servus servorum Dei, dilectis filiis Rectori et Universitati studii Parisiensis, salutem et apostolicam benedictionem.
Divinae providentiae dispositio et inscrutabilis scientiarum Domini altitudo, non humanum attendens judicium sed sola Sui disponens scientia universa; Ecclesiam sanctam Suam crebra plerumque decedentium mutatione pastorum visitat, ac novae prolis successione reformat; prout ex throno Suae ineffabilis Majestatis, in Cujus manu coelum et terra consistunt, conspicit expedire. Cum itaque nuper, superna disponente Clementia, in partem solicitudinis praefatae Ecclesiae, post exequiarum expleta solemnia felicis recordationis Alexandri V. praedecessoris nostri, quarta decima die instantis mensis, juxta morem a venerabilibus fratribus nostris ejusdem ecclesiae Cardinalibus, de quorum numero tunc eramus, discrepante nemine, decima septima ipsius mensis, licet insufficientibus meritis, fuerimus evocati, devotioni vestrae duximus ad vestram laetitiam praesentibus intimandum. Licet enim Dominus Deus noster, Suo nutu coelestia simul et terrena gubernans, cunctis Christicolis nos constituerit in specula praeeminentiae pastoralis, ad regendam Ecclesiam sanctam Suam, devotionem tamen praefatam, tanquam intimam et praecordialem filiam, recognoscimus specialiter nostrae solicitudini ab intimis commendatam. Nam pro statu et honore praefatae Ecclesiae ac ipsius tranquillitate, pace et unione totius gregis fidelium, vestris laude dignissimis actionibus agere, profutura semper curis saluberrimis ac singulari vigilantia, non destitit vel desistit.
Ad quorum prosecutionem pervigilem, fructu condignae recompensationis et gloriae etiam apud supernorum munerum Largitorem minime carituram, Universitatem eandem paternis affectibus exhortamur. De nobis autem, qui dum minori fungebamus officio sinceritatem vestram praecipua semper affectione dileximus, fiduciam volumus obtinere, quod ipsam Universitatem vestram deinceps continebimus in intimis visceribus cordis nostri; de vestris commodis, statu, gloria pariter et honore, prout inspirabit Altissimus, paterna solicitudine jugiter cogitantes: Super quibus et nonnullis aliis statum nostrum et praefatae Ecclesiae ac fidelium tranquillitatem concernentibus, venerabilem fratrem Alamanum [Aldimari], archiepiscopum Pisanum, et dilectos filios nobioem virum Nicholaum a Robertis, militem Mutinensem, ac Gonfridum de Perusia, utriusque juris doctorem ac regium consiliarium, nostrosque nuntios, de paterna nostra intentione circa praemissa plenarie informatos, ad eandem Universitatem vestram destinare providimus; quorum relatibus placeat adhibere credentiae plenam fidem,
Datum Bononiae, V. Idus Iunii, pontificatus nostri anno primo. [June 9, 1410]
The letter was sent twenty-four days after the Election of John XXIII, May 17, 1410. John XXIII had already, on May 28, in his bull In Apostolica sedes [Du Boulay, Historia Universitatis Parisiensis V (Parisiis 1670), pp. 204-205], revoked the Bull of Alexander V in favor of the Franciscans, Regnans in excelsis [Du Boulay, pp. 196-201], which had caused a great disturbance in the University of Paris.
©2011 John Paul Adams, CSUN
john.p.adams@csun.edu