©2011 John Paul Adams, CSUN
john.p.adams@csun.edu
George Williams (editor), Memorials of the Reign of King Henry VI: Official Correspondence of Thomas Bekynton, Secretary to King Henry VI, and Bishop of Bath and Wells Volume II (London 1872), no. CCXLIII, pp. 109-111:
Epistola Collegii cardinalium Studio Parisiensi transmissa, super morte Alexandri Papae et nova electione Johannis vicesimi tertii.
Dilectis nobis in Christo Rectori et Universitati studii Parisiensis, miseratione divina episcopi, presbyteri, ac diaconi, sacrosanctae Romanae Ecclesiae Cardinales, salutem in Domino sempiternam.
Ut emergentium Romanae ecclesiae casuum gravitatem in eventum quemlibet vestra devotio posset agnoscere, pridem occassum felicis recordationis domini Alexandri Papae V. die quarta praesentis mensis ab hac luce subtracti, eidem devotioni vestrae intimare curavimus. Postea vero celebratis de more exequiis, et praefati Alexandri olim pontificis honorifice corpore tradito ecclesiasticae sepulturae, Bononiae convenimus in apostolico palatio, ubi diem extremum idem clauserat Alexander, provisuri de praedefuncti pontificis et domini successore, ad regimen Ecclesiae sanctae suae; ut novae prolis successione eandem Omnipotens laetam faceret et foecundam. Missarumque solemnibus in honorem Sancti Spiritus devotissime ac humillime celebratis, quarta decima praesentis mensis in eodem palatio plena securitate ac votiva libertate firmato, conclave intravimus; et multiplicibus circa tam sublimem materiam habitis coloquiis atque tractatibus, ut Petri navicula, fluctuum agitata turbinibus, ad portum salutis sub remigio doctissimi piscatoris quo carebat reduci posset, vota nostra in reverendissimum in Christo patrem et dominum Baldassarem, tunc Sancti Eustachii diaconum cardinalem, utriusque juris doctorem, scientiae claritate conspicuum, ac spiritualium et temporalium donorum dotibus illustratum, opere ac sermone potentem, et qui, Deo auxiliante, indirecta dirigere et convertere aspera in vias planas sciet, poterit atque volet, ac fluctibus agitatam diutius naviculam ad portum reducere salutarem; sicut experimentis innumeris in gerendis rebus statum hujusmodi Ecclesiae concernentibus cunctis contemplari volentibus demonstravit gestaque sunt mundo notissima; ad culmen dignitatis apostolicae, Divina superillustrante Clementia, ac suis exigentibus meritis, nec immerito ascensurum unanimiter direximus ac concorditer; ita ut in pluralitate unitas nullaque contrarietas apparerent, ac eundem dominum Baldassarem in nostrum elegimus dominum atque patrem, Christique vicarium, ac beati Petri verum et unicum successorem, tandem eligentem se Iohannem XXIII. appellari: quem cum inthronizaverimus, juxta morem coronationis insignibus, ad Divini nominis laudem intendimus, prout in Altissimi gratia confidimus, celeriter sublimare. Hoc idem pontifex etiam per ipsius literas eidem vestrae Universitati indicare curabit. Quae ideo praefatae devotioni vestrae significare decrevimus, ut una nobiscum jocunditatem vestro percipiatis in corde, qui de obitu summi pontificis amaritudinem, ut censemus, proculdubio suscepistis: preces vestras ad Altissimum porrigentes, ut favorem Suae coelestis gratiae eidem domino nostro Iohanni Papae aspirando, concedat quod sub ejus salutari regimine proveniat quies regnis, pax ecclesiis, concordia plebibus, et moribus disciplina: eandem devotionem vestram nihilominus exhortantes, ut in devotione ac fidelitate, quas hactenus ad praefatam habuistis ecclesiam, velitis, prout indubitabili ratione censemus, incommutabiliter tanquam basis fortitudinis tam realiter quam filialiter permanere, ac illa semper efficere, per quae status et honor praefatorum ecclesiae ac domini nostri Papae, qui sua clementi benignitate ad filiorum tranquillitatem semper aspirat, felicibus extollantur effectibus, eademque vestra devotio, ultra sempiternae vitae praemia, actiones vestras apud sedem apostolicam invenire valeat jugiter operosas, circa singula commoditatem et honorem vestrum et publice ac privatim casu quolibet promotura.
Datum Bononiae, sub trium priorum nostrorum sigillis, die XVIJ. Maii, ab assumptione vero praefati domini nostri die prima, Mo CCCCmo Xo, Indictione tertia. [May 17, 1410]
The letter was sent on the very day of the Election of John XXIII, May 17, 1410.
©2011 John Paul Adams, CSUN
john.p.adams@csun.edu