Edmundus Martene et Ursinus Durand, Thesaurus novus anecdotorum   Tomus secundus (Parisiis 1717), columns 1280-1281:

Venerabilibus viris rectori et universitati studii Coloniensis amicis nostris carissimis miseratione divina episcopi ... presbyteri ... diaconi S.R.E. cardinales venerabiles viri amici salutem in Domino sempiternam.

Tendentes indubie universitatem vestram tota cordis affectione desiderabiliter affectare, ut miserabile ac Christi fidelibus pestiferum schisma tollatur de medio et in sacrosancta Ecclesia subsequatur desiderabilis unionis integritas, quae post obitum ac solemnes exequias felicis recordationis domini Innocentii papae VII. ab hujus vitae mortalitate subtracti die sexta Novembris proxime praeteriti, per nos circa praemissa ac electionem summi et futuri pontificis, ejusdem Innocentii successoris, celebrata fuerunt, quamvis sanctissimus dominus noster Gregorius papa XII etiam ea notificet, nihilominus sub compendio decrevimus intimare.

Defuncto siquidem eodem Innocentio, celebratis de more exequiis, ac illius corpore in basilica principis apostolorum de Urbe imposito, implorata Spiritus sancti gratia, conclave in palatio apostolico mox omnes intravimus, et ante omnia de divinae pietatis omnipotentia confidentes, ac exoptantes innumeris calamitatibus ac pressuris christianitatis, tam lacrymabiliter ex diuturno dicti schismatis morbo afflictae, quantum in nobis esset, finem imponere, unanimiter et concorditer nonnulla vovimus, ac nos obligando et jurando promisimus, et maxime quod si quis nostrum assumtus esset ad apicem summi apostolatus, pro integratione unitatis christianorum, renunciaret effectualiter juri suo et papatui pure, libere, et simpliciter, si et quando assumti adversarius, qui est et qui pro tempore esset, consimiliter renunciaret et cederet praetensis juri suo et papatui, sive decederet, dummodo illi qui apud dictum adversarium pro cardinalibus se gerunt, effectualiter vellent cum collegio nostro sic convenire ac concordare, quod ex hoc collegio et ipsis sequatur juste canonica electio unici summi Romani pontificis; ac etiam promitteret similiter ut praefertur, quod pendente tractatu unionis hujusmodi effectualiter et realiter ex utraque parte, non crearet nec faceret aliquem cardinalem, nisi causa coadaequandi numerum sui collegii cum numero illorum se gerentium pro cardinalibus adversarii supradicti: nisi ex defectu steterit adversae partis, quod unionis praefatae conclusio infra annum et tres menses a die suae inthronizationis computandos non fuerit subsequuta: quo casu, liceret eidem cardinales eligere et creare prout pro statu suae matris Ecclesiae eidem videretur convenire, prout de praemissis et aliis conventis latius patet.

Quibus solemniter celebratis, post solemnes de futuri pontificis electione tractatus, iullo divinitus inspirante qui cuncta perpetua ratione gubernat, vota nostra in Reverendissimum tunc in christo Patrem et dominum ex nostro collegio dominum Angelum tituli S. Marci presbyterum cardinalem confratrem nostrum ad culmen dignitatis apostolicae post divinae gratiae munera, universis ejus exigentibus meritis, nec immerito ascensurum, nemine discrepante, direximus: ipsumque confratrem nostrum die ultima Novembris in dominum nostrum elegimus atque Patrem. Tandem post reluctationem et condescensionem ad vota nostra eligentem se Gregorium XII. appellari, quem cum adoravissemus, inthronizavimus, et mox coronationis insigniis insignire curavimus juxta morem, qui post inthronizationem ipsam omnia et singula per nos et ipsum tunc fratrem nostrum conventa et firmata confirmavit, ac denuo vovit, promisit consimiliter et juravit, propriaque manu subscripsit inde confecta publica documenta, prout in ipsis latissime continentur.

Quae ideo praefatae universitati vestrae intimare decrevimus, ut iis cognitis de pace et unitate praefatae Ecclesiae bonam spem possitis suscipere, ac de promotione hujusmodi collaetari. Nam profecto confidimus tempus advenisse acceptabile, in quo anxia christianorum vota complebuntur. In ceteris autem rebus quae ad vestram universitatem attinerent nos offerimus semper pronos.

Datum Romae in palatio apostolico XI. die assumtionis praefati Domini nostri, decimo vero Decembris millesimo quadringentesimo sexto.

 

November 11, 2013 11:37 AM

©2011 John Paul Adams, CSUN
john.p.adams@csun.edu