Lucas d' Achery, Veterum aliquot scriptorum spicilegium  Tomus VI (Parisiis 1664), 45-48:

 

In nomine Domini amen.  Noverint universi tam praesentes quam futuri, praesens publicum Instrumentum inspecturi et audituri.  Quod anno a Nativitate Domini nostri Iesu Christi millesimo trecentesimo octuagesimo primo, Indictione quarta, die Lunae vigesima sexta mensis Augusti, Pontificatus Sanctissimi in Christo Patris et D(omini) N(ostri) D(omini) Clementis, divina providentia Papae VII. anno tertio, in praesentia testium, et mei Notarii publici Antonii, infra scriptorum ad hoc vocatorum specialiter et rogatorum.  Reverendissimus in Christo Pater et Dominus Dominus Simon de Brossano civitatis Mediolani, miseratione divina tituli Sanctorum Iohannis et Pauli Sanctae Romanae Ecclesiae Presbyter, Cardinalis Mediolanensis vulgariter nuncupatus, existens sanus mente, memoria, et intellectu, licet aeger corpore, cognoscens se mortalem ac diem et horam sui obitus penitus ignorans, invocato, etc.  Infra scriptam suam declarationem antequam suum conderet Testamentum fecit in haec verba:

In Nomine Omnipotentis Dei Patris et Filii et Spiritus sancti:  Ego Simon de Brossano civitatis Mediolanensis tituli SS. Iohannis et Pauli Sanctae Romanae Ecclesiae Presbyter Cardinalis, volens meipsum et totum populum Christianum, quantum in me est, declarare, et ipsum de veritate informare in facto praesentis Schismatis nostris temporibus, proh dolor, exorti, et discordiae super Papatu existentis, et quantum mihi possibile est, de Christianitate omne dubium removere, et de cordibus quorumcumque Fidelium istud schisma pestiferum radicitus extirpare, et ut populus Christianus ad unitatem sanctae matris Ecclesiae reducatur, pro qua unione standeo de medio, et velut indifferenter, nec ad unam partem nec ad aliam declinando, usque ad haec tempora, una cum Reverendissimis Patribys et Dominis meis Petro Episcopo Portuensi, dicto Florentino, et Iacobo de Ursinis bonae memoriae, Sanctae Romanae Ecclesiae Cardinalibus, fideliter laboravi.  Idcirco nolens quicquam sub verborum involucro neque ambigue loqui, neque obscure, sed clare, attentis omnibus quae intervenerunt in facto hujusmodi schismatis, et his quae disponuntur, et ordinantur in jure exprese.  Dico et assero, et aperte declaro electionem Bartholomaei tunc Barrensis factam fuisse per impressionem et nullam ipso jure, sicut etiam Reverendissimi Patres et Domini Domini Cardinales ultramontani hoc idem declaraverunt et publicaverunt. Et electionem sanctissimi in Christo Patris D. N. D. Clementis, divina clementia Papae VII. factam a numero sufficienti RR. PP. et DD. Cardinalium esse validam et canonicam.

Item dico, quod si verbo, scripto, disputatione, vel opere aliquid unquam dixerim vel fecerim contra praefatum sanctissimum Patrem et D. nostrum Papam Clementem, confietor me errasse, et humiliter veniam peto, ac recommendo animam mean et familiam meam eidem SS. Domino nostro Papae Clementi tanquam vero Christi Vicario, et B. Petri successori legitimo, ac etiam omnibus DD. Cardinalibus, ut eam habeant favorabiliter recommendatam, prout indubie spero.  Quam quidem declarationem meam volo et mando in cunctis mundi partibus publicari, atque de ipsa declaratione mea, et imnibus et singulis supradictis volo et mando, quod conficiatur publicum Instrumentum, unum et plura, et tot quot expedierit et fuerit opportunum, per te, Antonium Notarium publicum et scribam meum, hic praesentem una cum Reverendis PP. et Dominis meis  DD. Petro Florentino et Guillelmo sancti Angeli, Sanctae Romanae Ecclesiae Cardinalibus, et Reverendo Patre Domino Iohanne [Placentinis] Episcopo Castellano, et nobili viro Zavardo de Vicedominis de Placentia, ac venerabilibus viris DD. Fratre Petro de Alzate Ordinis Humiliatorum Camerario meo, et Iohanne de Mondellis legum Doctore et Auditore meo, in quorum praesentia hanc declaratio mea sit magis valida, et authentica, et majorem roboris obtineat firmitatem, utque eidem indubia fides adhibeatur; iterum in effectu, dante Domino, eamdem relplicabo, et faciam poni et inseri in meo Testamento, quod hodie facere intendo, per te Antonium Notarium publicum tradendo, conficiendo, et publicando: Et rogo et instanter requiro vos praefatos Reverendos Patres Dominos Cardinales Florentinum et sancti Angeli hic praesentes, ut dictam meam declarationem ubique publicent et in omnium notitiam deducant.  Qui Reverendi Patres Domini Florentinus et sancti Angeli Cardinales, ad ipsius Reverendi Patris Domini Simonis Cardinalis Mediolanensis precem et instantem requisitionem, hujusmodi eidem gratiose respondentes liberaliter promiserunt, se velle etiam et in hoc libenter facere et effectualiter adimplere juxta ipsius voluntatem toto eorum posse.  De qua quidem declaratione et supradictis omnibus et singulis factis, dictis, actis, et gestis per praefatum Reverendum Patrem Dominum Simonem Cardinalem Mediolanensem, et responsum eidem per praefatum Reverendum Patrem Dominum Cardinalem Florentinum, et S. Angeli; idem Dominus Cardinalis Mediolanensis voluit et mandavit, ac requisivit et rogavit me Antonium Notarium publicum supra et infra scriptum, ut inde publicum conficerem Instrumentum unum, et plura, et tot, et quot expedierit et fuerit opportunum.

Acta sunt haec Niceae in domo Fratrum Praedicatorum, ubi praefatus Reverendus Pater Dominus Simon Cardinalis habitabat, Anno, Indictione, m,ense, die, et Pontificatu praedictis, praesentibus suprascriptis Reverendis in Christo et DD. Domino Florentino Episcopo Portuensi, et G. Sancti Angeli Diacono, Sanctae Romanae Ecclesiae Cardinalibus, ac Reverendo Patre in Christo Domino Iohanne Episcopo Sastellano, necnon nobili viro Zavardo de Vicedominis de Placentia, ac Venerabilibus et circunspectis viris DD. Fratre Petro de Alzare Ordinis Humiliatorum, et Praeposito Domus Sanctae Mariae de Brayda Mediolanensi Camerario, et Iohanne de Mondellis legum Doctore, et Praeposito Ecclesiae Sancti Laurentii Mediolanensis, Auditore praefati Reverendi Patris Domini Cardinalis Mediolanensis, etstibus idoneis ad praemissa, vocatis specialiter et rogatis.

Et ego Antonius Bassavega quondam Sylvestri de Mediolano publicus Apostolica et Imperiali auctoritate Notarius, Secretariusque et Scriba praefati Reverendi Patris in Christo et Domini D. Simonis Cardinalis Mediolanensis praedictae ejus declarationi, et omnibus et singulis supra scriptis duim sic, ut praemittitur, dicerentur, agerentur, et fierent una cum praenominatis testibus interfui, et ea ut supra dictum est, dici, fieri, vidi, audivi et intellexi, acrogatus et requisitus per supradictum R. P. Dominum Simonem Cardinalem Mediolanensem hoc Instrumentum publicum confeci, tradidi et publicavi, et in hanc publicam forman redegi et scripsi, et me subscripsi, signoque meo consueto apposito in testimonium et fidem pleniorem praemissorum roboravi.

 

 

---

Bishop Johannes de Placentinis of Castello (from 1375) was made a cardinal by Clement VII on July 12, 1385 [Eubel, Hierarchia catholica I, pp. 28 and 171].  He died on May 9, 1404  [Baluzius Vitae Paparum Avinionensium p. 1345]