:

Radevicus (or) Rahewinus (pupil and Continuator of Otto of Frising, Gesta Frederici I Imperatoris), II. 64 [J. Watterich Pontificum Romanorum Vitae II, pp. 460-461]:

Victor, servus servorum Dei venerabilibus fratribus patriarchis, archiepiscopis, episcopis et charissimis filiis abbatibus, ducibus, marchionibus, comitibus et caeteris principibus, et egregiae familiae imperiali, in sacratissima curia domini Friderici serenissimi ac invictissimi Romanorum Imperatoris commorantibus, salutem et Apostolicam benedictionem.

Quam et in quantum et ecclesiastici status decorem et honorem Romani imperii et nobilitatem omnium bonorum hactenus sincere dilexerimus et quae mutuae charitates sint invicem frequenter exhibitae, nequaquam credimus a vestrae magnitudinis excidisse memoria. Nunc autem tanto propensiores dilectionis efficaciam vobis et imperio cupimus exhibere, quanto, Deo auctore, ad maiorem conscendimus dignitatem. Quapropter universitatem vestram, de qua plene confidimus, plurimum deprecamur, ut pro beati Petri apostolorum principis reverentia et antiquae dilectionis constantia, quae inter nos inviolabiliter perseverare dinoscitur, dominum imperatorem invictissimum commonendo rogetis, quatenus imperio sibi a divina clementia commisso et ecclesiae Dei, sponsae Iesu Christi, cuius advocatus et defensor divinitus est constitutus, providere et subvenire non tardet, ne in tanta discordia adversariorum malitia nequiter praevalere, navicula beati Petri procellis et tempestatibus suo tempore quassari et decus imperiale valeat aliquatenus obnubilari. Insuper universitati vestrae dignum duximus intimandum, qualiter ad Apostolatus officium, Domino concedente, vocati fuerimus. Felicis memoriae Papa Adriano praedecessore nostro viam universae carnis ingresso (et) in beati Petri basilica tumulato, convenimus omnes de electione summi Pontificis tracturi. Post longam vero collationem et diutinam deliberationem, divina tandem inspirante clementia, electione venerabilium fratrum nostrorum episcoporum, presbyterorum sanctae Romanae ecclesiae cardinalium, cleri quoque Romani, petitione eiusdem populi, assensu etiam senatoriae dignitatis honoratorum, insuper capitaneorum, ad summum Pontificatum annuente Deo canonice sumus electi et in sede Apostolica collocati ac deinde prima Dominica mensis octobris [October 4, 1159] benedictionis consecrationem et nostri officii accepimus plenitudinem. Quodcirca universitatem vestram humiliter deprecamur, quatenus nos apud ipsum precibus adiuvetis, a quo omnis est potestas et honor dignitatum. Si autem ex parte illius Rolandi quondam cancellarii per conspirationem et coniurationem contra ecclesiam Dei et imperium Wilhelmo Siculo astricti, qui die XII post electionem nostram se fecit intrudi, quod a seculis non est auditum, ad vos scripta pervenerint, tanquam mendacio plena et a schismatico et haeretico destinata respuatis et aures vestras nequaquam illis ullatenus praebeatis.

Data Signiae V Kalend. novembris.

 

---