:

L'abbé Maratu, "Guillaume de Noellet, cardinal-diacre de Saint-Ange (vers 1340-4 juillet, 1394)," Bulletin de la Société archéologique et historique de la Charente 10 (1875) 87-88 :

Miseratione divina collegium S.R.E. Cardinalium, etc. Dilectis filiis Rectori, Magistris, Doctoribus et Scholaribus Universitatis Parisiensis salutem et post litterarum gloriosa certamina aeternae felicitatis bravium adipisci.

Scripsisse nos vobis recolimus per dilectum filium Johannem de (Gurgunte) in Sacra Theologia Bacculareum ea quae per insanum populum miserabilis urbis Romae, ejus que Officiales perfidos dira tyrannide, ausu que sacrilego, belluarum saevientium more, dum post obitum fel. record. Domini Gregorii Papae XI (ad) futuri electionem Pontificis curaremus, tam in personas nostras quam bona, enormi actuum multiplicatione infeliciter patrata sunt, ut per ipsorum effrenatam malitiam aliquis in Sede Apostolica intruderetur, prout rei exitus lucide demonstravit. Hac itaque occasionehabet Petri sedes sessorem apostaticum unice dilectae Domini tunicae invasorem, satorem erroneorum dogmatum, et veritatis totius contemptorem. Hunc certe non tradidit canonica electio; hunc Spiritus Domini non vocavit; hunc non stabilivit consensus; hunc truculenta rabies et Senatiniorum intrusio in Apostolica Sede intrusit. Ne igitur intrusus ipse, qui datus in sensum reprobum, terreni fastus appetitor factus est, per suam obstinatam malitiam et obstinationem iniquam, fidelios aliquos super praesenti negotio faceret dubitare, ad publicationem quamdam processimus: sicut per dicectum filium Petrum de Corberia Secretarium Regium praesentium portitorem informabimini plenius; cujus relatis fidem petimus adhiberi.

Datum Anagniae XVII Kalendas Septembris, Anno Domini MCCCLXXVIII. Apostolica Sede vacante.