John Paul Adams, CSUN
john.p.adams@csun.edu
:
Caesaris S. R. E. Cardinalis Baronii, Od. Raynaldi et Jac. Laderchii Annales Ecclesiastici Tomus septimus (Lucca: Typis Leonardi Venturini 1752) [Baronius-Raynaldi], pp. 298-299 :
Gregorius episcopus servus servorum Dei ad perpetuam rei memoriam futurorum.
Periculis et detrimentis gravissimis, quae ecclesiae sanctae Dei ex longa vacatione propter guerras ingruentes et earum occasione, et alias quam plures causas possent accidere, salubri remedio obviare cupientes authoritate apostolica tenore praesentium irrefragibiliter statuimus et etiam ordinamus, quod si hinc ad kalendas septembris proxime futuras contingat nos decedere, sanctae ecclesiae Cardinales, tunc in Romana curia praesentes, seu major pars, absentibus non vocatis nec aliquatenus expectatis, possint licite quemcumque locum alias honestum voluerint, eligere sive intra vel extra urbem, etiam minoris partis praesentium, contradictione non obstante, pro electione futuri summi Pontificis immediate successoris nostri hac vice facienda, recipere et habere, et tempus Cardinalibus praefixum ad expectandum Cardinales absentes, antequam ad electionem summi Pontificis procedant et conclave pro eligendo ingrediantur, abbreviare vel prolongare vel in totum tollere, prout ipsis vel pajori parti ipsorum videbitur, expedire, locumque praedictum electum et receptum semel vel pluries mutare, aliumque de novo recipere, et sine eo quod aliquod conclave ingrediantur, libere eligere, prout ipsis vel majori parti ipsorum videbitur [299] opportunum, minori parte non consentiente, seu etiam contradicente; dantes et concedentes authoritate apostolica, et de plenitudine potestatis praedictis Cardinalibus praesentibus, seu majori parti ipsorum omnem potestatem et authoritatem eligendi Romanae et universalis ecclesiae summum Pontificem nobis immediatum successorem; statuentes ac decernentes authoritate apostolica et de plenitudine potestatis, ut ille, qui a praedictis Cardinalibus in Romana curia praesentibus, vel majori parte, numero ipsorum minori parte etiam non consentiente vel contradicente, in Papam et Romanum Pontificem electus fuerit, sanctae Romanae et universalis ecclesiae summus Pontifex et pastor absque ulla exceptione sit et habetur: praedictorum Cardinalium conscientias de eligendo bono pastore onerantes, et ipsos absecrantes per viscera misericordiae Dei nostri; ipsisque nihilominus injungentes districtius et sub poenis juris, quod in praemissis pure, simpliciter, absque omni fraude, ac celeriter quantum potuerunt secundum Deum et eorum conscientias procedere non postponant; constitutionibus praedecessorum nostrorum Romanorum Pontificum contrariis non obstantibus quibuscumque, quas inquantum praemissis obviant, vel alicui praemissorum, volumus pro ista vice pro infectis haberi. Ipsas tamen, et ipsarum modificationes alias volumus in suo robore permanere. Nulli ergo, etc.
Datum Romae apud S. Petrum XIV. kal. aprilis, pontificatus nostri anno VIII.
John Paul Adams, CSUN
john.p.adams@csun.edu