Guillaume Ribier (editor), Lettres et mémoires d' Estat des Roys, Princes, Ambassadeurs et autres Ministres , sous les Règnes de François premier, Henry II, et François II   Tome second (Paris 1666),  pp. 604-605. 

Mon cousin,

Je ne veux ny entends estre rien épargné de tout ce qui sera en ma puissance, pour faire que vous, mon Cousin le Cardinal de Ferrare, parveniez au Papat: ainsi que le porte le Memoire que je vous envoye; outre ce que j'ay écrit resolutivement à mon Ambassadeur le Sieur d' Avanson, avec commandement exprés, qu' il n' ait à mettre, ny tenir aucun des Cardinaux en quelque esperance alternative, ou autre quelle que ce soit, qui les peust garder de se resoudre, et convenir unanimement à vostre Election et Creation: sinon au cas et ainsi que je luy ay donné charge de vous faire entendre: car vous ne voudriez pas que je perdisse l' occasion de faire, que celuy sera eleu et crée Pape, autre que vous, n' ait quelque obligation envers moy du lieu qu' il tiendra, puisque je dois avoir l' une des bonnes ou meilleures parts en la Congregation et Compagnie du Conclave.  A cette cause vous regarderez si ainsi est, avec les autres Cardinaux François et Italiens, qui seront de mon party, de choisir et élire celuy des nommez, que vous jugerez avoir meilleure part au Papat;  entre lesquels je trouveray tousjours bon Pole, ou le Doyen Theatin, si nos Francois en sont exclus.

4 Avril.

 

Le Roy pour le singulier desir et affection qu' il a que Monseigneur le Cardinal de Ferrare puisse parvenir au Papat, entend que tous les voeux de Messieurs les Cardinaux qui sont, et se poutront tirer a sa devotion, soient par eux unanimement concedez et baillez en faveur dudit Cardinal, et qu' avec cela il n'y soit épargné aucune chose, qui soit en la puissance et disposition de sa Majesté pardelà:  outre la diligénce et tous les bons Offices qu' y pourront adjouster les Ministres et Serviteurs que sadite Majesté à Rome.  Davantage afin que ledit Cardinal puisse disposer et accommoder les volontez de ceux qu' il voudra pratiquer a fair pour luy, ce dont il les requerera en cette occasion qui s' offre; le Roy permet et consent, qu' il les puisse gratifier de tous les Benefices qu' il tient pardeçà en ce Royaume, ceder et resigner la Protection qu' il a des affaires de France en Cour de Rome, en faveur de celuy desdits Cardinaux qu' il advisera, et dont il se sera prevalu, ou poura prevaloir pour ce mesme effet et occasion; esperant bien qu' il ne mettra ladite Protection en main de personnage, qui ne soit avec son authorité et bon moyen, pour favoriser et tenir en reputation les affaires dependans de ladite Charge de Protecteur.

Aussi pourra au nom du Roy ledit Cardinal promettre aux autres Cardinaux qui luy voudront et pouront aider, jusques à vingt-cinq mille escus de revenu en Benefices, des premiers qui viendront cy-aprés à vaquer en la disposition de sa Majesté: et sur le tout bailler a ceux ausquels il promettra audit nom, telle asseurance qu' il verra estre requise.  A quoy il sera par ladite Majesté satisfait, sans aucune faure, ny difficulté.

Fera encores iceluy Cardinal tout ce qu'il luy sera possible, pour induire et persuader le Cardinal de Mantoue [Ercole Gonzaga], et semblablement celuy de Trente [Cristoforo Madruzzo], à faire pour luy en certe Election au Papat, tout ce qu' ils pouront, et n' épargnera pour cét effet envers l' un et l' autre desdits deux Cardinaux les moyens et facultés que le Roy lui à donné cy-dessus, pour la disposition de tout ce qu'il tient sous luy; ensemble des autres Benefices venant des premiers à vacquer, jusques à ladite valeur de vingt-cinq mil escus; et poura encores, s'il voit que bon soit, adjouster aux persuasions qu'il fera audit Cardinal de Trente, ce qu'il verra estre à propos, de la reconnoissance que fera le Roy envers luy, se declarant pour iceluy Cardinal de Ferrare.

De Launay,  4. Avril.

HENRY

 

---

 

 

 

December 26, 2013 8:53 AM

©2013 John Paul Adams, CSUN
john.p.adams@csun.edu