Gobelinus: Cosmidromius Gobelini Person   ed. Max Jansen (Munster i. W.: Aschendorff 1900), cap. 88, p. 154; Augustinus Theiner (Editor), Caesaris S. R. E. Cardinalis Baronii, Od. Raynaldi et Jac. Laderchii Annales Ecclesiastici   Tomus Vigesimus Septimus 1397-1423 (Barri-Ducis: Ludovicus Guerin 1874), sub anno 1404, no. 10, page 115:

 

Vacante igitur sede cardinales infrascripti congregati, videlicet Angelus tituli sancti Laurencii Florentinus, Franciscus tunc sanctae Susannae Monopolitanus, Henricus sanctae Anastasiae Neapolitanus, Cosmatus sanctae Crucis in Iherusalem Bononiensis, Angelus sanctae Potencianae Laudensis presbyteri, nec non Raynaldus sancti Viti in macello de Branchaciis et Landolfus sancti Nycolai in carcere Tulliano Barensis diaconi conclave intraverunt et coram pluribus notariis et testibus solempnibus compromiserunt et compromissum servare iuraverunt nec unquam se absolvi ab illo iuramento se petituros neque absolucionem aliquam recepturos se ab eodem, videlicet: quod ipsi singuli et communiter, et si quis eorum forte in papam eligeretur, vellet omnem diligenciam quam posset adhibere ad hoc, quod unitas ecclesiae reformaretur, etiamsi opus esset ad hoc renunciare papatui vel resignare illum, qui ex eis papa fieret, et quod cardinales absentes ad simile iuramentum praestandum coartarent. Et si forte novos cardinales postea creari contingeret, quod ante omnia simile iuramentum praestarent.

Et post hoc processum est ad electionem, et electus est ex eis dominus Cosmatus supradictus et vocatus est Innocentius septimus. Hic statim post electionem suam regimen Urbis Romanis reddidit. Unde elati in superbiam insolencias eis consuetas ultra modum exercere praesumpserunt. Dominus vero Innocentius papa archiepiscopis et prelatis per diversa regna constitutis literas suas cum nunciis solempnibus direxit insinuans eis quod in Kalendis Novembris [November 1, 1405] deinde proxime futuris concilium generale in urbe Roma pro unione ecclesiae esset celebraturus, et exhortans eos, ut se cum praelatis sibi subditis vel saltem viros ydoneos ad idem concilium dirigere curarent. Sed adveniente mense Septembri [September, 1405] Romae inter amicos papae et quosdam Romanorum orto disturbio quidam Romani, emuli papae, a fidelibus eius trucidati sunt [actually Augus 6, 1405]. Quare papa quasi fugiendo ab Urbe recessit et Viterbium se transtulit. Unde multi curtizani a Romanis capti custodiis deputati sune, nec non rebus suis spoliati. Sed Paulus de Ursinis nobilis Romanus cum exercitu magno Romam venit et, fugato Iohanne de Columpna nobili Romano papae adversario cum suis complicibus, populum Romanum quodammodo pacificatum reddidit. Adveniente die pro concilio celebrando praedicto praelatis Teutoniae disturbio supradicto permotis non venientibus, papa diem concilii ad diem beati Martini continuavit [November 11, 1405]. et deinde usque ad Kalendas mensis Maii futuras [May 1, 1406] ipsum concilium prorogavit.

---