SEDE VACANTE 1304-1305

July 7 , 1304 —June 5, 1305

Augustinus Theiner (Editor), Caesaris S. R. E. Cardinalis Baronii, Od. Raynaldi et Jac. Laderchii Annales Ecclesiastici   Tomus Vigesimus Tertius 1286-1312 (Barri-Ducis: Ludovicus Guerin 1871):

 

Sanctissimo patri et DD. Bertrando archiepiscopo Burdigalensi, divina providentia in summum Pontificem electo, miseratione divina Joannes Tusculanus,Theodericus civitatis papalis et ... episcopi; et ... presbyteri; et ... diaconi cardinales pedum oscula beatorum.

Recordatus est Dominus misericordiae suae et plebem suam non despexit in finem, quia dum prolixae vacationis Romanae, et per consequens quodammodo universalis Ecclesiae respexisset incommoda, et longa illius ex variis causis suspiria cognovisset, in tempore accepto exaudivit eam, et in die salutis misertus est ejus: sanavit quidem, quia commota erat, contritiones ipsius, et vidua per electionem canonicam generoso sponso oblata est: speciosa facta et sicut crapulatus a vino et a somno dormiens excitata surrexit, et ubi desperabat magis, ut lucifer est exorta, unde serenus dies illuxit nobis et S. Spiritus illustratis ardore populis, qui orbati patre gradiebantur in tenebris, tanquam quoddam sidus apparuit, quod fulgore proprio velut stella matutina coruscans, cunctos fideles irradiat suae lumine claritatis. 

Dudum siquidem eadem Romana Ecclesia per mortem sanctae memoriae domini Benedicti PP. XI pastoris solatio destituta, nos Theodericus civitatis papalis, Leonardus Albanensis, Petrus Sabinensis, frater Joannes Portuensis, Nicolaus Ostiensis et Velletrensis episcopi; Joannes SS. Marcellini et Petri, Robertus S. Potentianae, Gentilis S. Martini in Montibus, (presbyteri cardinales); Neapolo S. Adriani, Landulphus S. Angeli, Guillelmus S. Angeli  (sic!  S. Nicolai) in Carcere Tulliano, Franciscus S. Angeli (sic! S. Georgii) ad Velum-Aureum, Franciscus S. Mariae in Cosmedin et Lucas Sanctae Mariae in Via-Lata diaconi cardinales; una cum venerabilibus patribus Joanne Tusculano episcopo, Matthaeo S. Mariae in Porticu, et Richardo S. Eustachii diaconis cardinalibus apud Perusium fuimus pro substituendo Pontifice conclave palatii, in quo idem domminus Benedictus mortis suae tempore morabatur, ingressi;  et tandem dictis Tusculano (et caeteris) episcopis, necnon Matthaeo et Richardo diaconis, necnon fratre Waltero S. R. E. presbytero cardinali, qui absens postmodum supervenit et praedictum intravit conclave, ex manifestis infirmitatum causis, ut asserebant, idem conclave egressis, et tunc extra illud morantibus certis; ex nobis votorum nostrorum scrutatoribus, inquisitoribus voluntatum eorumdem scrutatorum electis, per viam scrutinii ad electionem de vobis hac die sabbati in Vigilia Pentecostes [Saturday, June 5, 1304] processimus in hunc modum:

Quia primo per deputatos ad id inquisitores scrutatorum ipsorum, et demum per ipsos scrutatores singulorum nostrum votis inquisitis secreto et mox in communi etiam publicatis, compertum extitit, quod in universo eramus XXV [sic!] cardinales in conclave manentes, et qui deposueramus in scrutinio vota nostra: quodque nos Albanensis, Sabinensis, Portuensis, et Ostiensis episcopi; Joannes, frater B., Lucas, Guillelmus et ...Gaytani diaconi cardinales praedicti, vos in eodem scrutinio in summum nominaveramus et elegeramus Pontificem.  Quo comperto nos Theodericus civitatis papalis episcopus, frater Gentilis presbyter, Franciscus, Jacobus et Lucas diaconi cardinales praedicti accessimus juxta morem, ac subsequenter de voluntate et speciali mandato nostro venerabilis pater Franciscus Gaytanus praedictus suo nomine et omnium nostrorum forma subscripta vos elegit, nominavit in Romanum Pontificem et pastorem in nomine Patris et Filii et Spiritus Sancti ad honorem Dei et B. Mariae matris ejus.

Ego Franciscus S. Mariae in Cosmedin diaconus cardinalis venerabilem patrem dominum Bertrandum archiepiscopum Burdegalensem nomine meo et omnium, qui eum in summum Pontificem elegerunt et nominaverunt, consenserunt et accesserunt, eligo in summum Pontificem.  Quam electionem cantico divinae laudis praecantato fecimus juxta morem clero et populo solemniter publicari.  Pie igitur, pater, electioni hujusmodi vestrum dignemini praestare consensum. In praedictorum autem testium irrefragabilem fidem ea in praesentis decreti scripturam redigi fecimus, et nostrorum necnon dictorum Tusculani episcopi fratris Gentilis S. R. E. presbyteri, Matthaei S. Mariae in Porticu et Richardi S. Eustachii diaconorum cardinalium sigillis et subscriptionibus communiri.  Actum et datum Perusii an. Domini MCCCV, non. Julii (sic! Junii). Indictione III.

Ego Joannes Tusculanus episcopus electioni factae de venerabili patre domino Bertrando archiep. Burdigalensi in summum Pontificem consentio, et eam approbo, atque gratam habeo et acceptam, ipsumque, licet absentem, in summum Pontificem recipio et recepi, necnon sigillum meum huic decreto apposui et subscripsi.  Et sic scribant se omnes qui interfuerunt.

Ego Leonardus episcopus Albanensis venerabilem patrem dominum Bertrandum Burdegalensem archiepiscopum in scrutinio nominavi et elegi in summum Pontificem, et electionem factam de eo in summum Pontificem recepi et huic decreto sigillum meum apponi feci et me subscripsi, et sic omnes, qui dederunt voces suas in scrutinio, se subscribant.

Ego Theodericus Civitatis Papalis episcopus post publicatum scrutinium ante electionem communem subsecutam accessi, et electionem mandavi fieri de venerabili patre domino Bertrando archiepiscopo Burdigalensi summum Pontificem electo, et factae electioni de eodem archiepiscopo consentio et consensi; et ipsum licet absentem in summum Pontificem recipio et recepi, necnon sigillum meum huic decreto apponi feci, et sic omnes, qui accesserunt.

 

 

 

---

Clement V was crowned at Lyon on November 13, 1305, after having waited for the Cardinals to arrive from Perugia.  They had wanted Clement to come to Perugia for his coronation, but Clement ordered them to come to France.  King Philip IV attended the coronation.