Sede Vacante 1185

J. L. A. Huillard-Bréholles (editor), Chronicon Placentinum et Chronicon de rebus in Italia gestis (Parisiis: Henricus Plon 1856), 137-138:

M.C.LXXXIIII, mense septembris, imperator Fredericus venit Lombardiam et primo intravit Mediolanum pacifice, postea Papiam, postea Cremonam, deinde Veronam ad colloquium cum domino Lucio papa qui nuper successerat Alexandro; et ibi stetit longum tempus, de quo Lucio papa dictum est:

Lucius est piscis et rex tyrannus aquarum,
    A quo discordat Lucius iste parum.

Postea ivit Vicentiam, Trivixium, Paduam, postea reversus est in Veronam, demum ivit Brixiam, postea Pergamum, demum Laudam, postea Placentiam et Papiam et Mediolanum, et collecto magno exercitu et cum centum militibus Mediolanensibus et peditibus et carocio, et CC militibus Placentinis et cum parte Pergamensium et Brixiensium et cum paucis militibus Verone, Terdone, et Parme, Regii et Mutine, Bononiensium et Ymole, Faventie, Alexandrie, Novarie, equitavit ad Cremam levandam, possuitque Cremascos intus locum Creme. M.C. LXXXV, die martis VII mensis madii [Tuesday, May 7, 1185], et rehedificavit illum locum; ad quam rehedificationem multi rustici Placentie et Mediolani perrexerunt.

Post haec, circa Kalendas Julii proximi [ca. July 1, 1185], imperator equitavit ad accipiendam dominam Constanciam filiam regis Rogerii Apulie in nurum et uxorem Henrici filii sui et habuit pro dote multos equos honeratos auri et argenti et preciosarum rerum. Quae domina Constancia die veneris XV Kalendas Novembris proximi [Friday, November 15, 1185] intravit Papiam, et die lunae VI Kalendas Februarii [Monday, January 27, 1186] rex Henricus eam in eadem civitate desponsavit, presentibus cardinalibus, [Theobaldo] episcopo Hostiensi et domino Sufredo, ad hoc delegatis a domino Urbano papa, qui nuper successerat Lucio pape felicis memorie, et aput Mediolanum maximas nuptias celebravit.

MCLXXXVI, prima ebdomada madii, imperator Fredericus cum carocio Mediolani et Alexandrinis, Laudensibus, Cremaschis et CC militibus Placentinis et paucis militibus Bononie, Mutine, Regii, Parme, Vercellarum, Terdone, equitavit in comitatum Cremone et circa Sunccinum omnia devastavit; deinde pervenit ad Castrum Manfredum situm non multum longe a Crema, et obsedit illud et destruxit non vi, sed per concordiam quam fecit cum Cremonensibus....